Paula Prado, o azoute da oposición

O domingo, 9 de marzo, vólvese producir unha das fórmulas de manipulación máis utilizadas polos responsables e colaboradores dos informativos da TVG.

O Telexornal serán ofrece dúas noticias sobre o BNG e ANOVA.

A primeira delas alude a que o Bloque Nacionalista Galego irá só con Bildu ás eleccións europeas, xa que os cataláns de Candidatura d’Unitat Popular (CUP), que barallaban presentarse xunto con galegos e vascos, non irán finalmente aos comicios:

http://www.crtvg.es/informativos/o-bng-presentase-as-europeas-so-con-bildu-767548

Por certo, non se da nin unha soa imaxe do BNG (aínda que a noticia destaca que irán ás eleccións só con Bildu…), e só se ofrecen as dunha asemblea dos cataláns de Candidatura d’Unitat Popular.

De seguido fálase da intervención de Martiño Noriega na Radio Galega, resaltando na presentación que “é consciente da división existente na formación, e que ten moito traballo por diante” (sic)…

Pero nos segundos de entrevista que se emiten, o coordenador de Anova non se refire para nada a eses aspectos. Fala da “complexidade”, pero sobre todo, da ilusión que suscita o proxecto:

http://www.crtvg.es/informativos/martino-noriega-volve-coordinar-a-permanente-de-anova-767547

Sorprende tamén ese tratamento, cando o Telexornal Mediodía do mesmo domingo elaborou a información sobre o nomeamento de Noriega, sen incidir en ningún momento en divisións ou problemas internos:

http://www.crtvg.es/informativos/martino-noriega-volve-coordinar-a-permanente-de-anova-767476

Volvendo co Telexornal Serán, tras a noticia de Noriega chega a “puntilla” habitual nestes casos. Inclúense unhas declaracións da voceira do PP de Galicia, Paula Prado, nas que critica ao BNG por ir con Bildu ás eleccións europeas -argumentando que non condenan os actos terroristas-, e tamén  a Anova “porque se pelexaron por un escano”.

Por certo, o titular da noticia na web mete a toda a oposición no saco (iso incluiría ao PSOE, claro), deste xeito: “Paula Prado critica as políticas e as formas da oposición”:

http://www.crtvg.es/informativos/paula-prado-critica-as-politicas-e-as-formas-da-oposicion-767546

Se os responsables de informativos da TVG tivesen a mesma adicación e axilidade para meter – por exemplo – declaracións da oposición en Santiago polas presuntas corruptelas do PP no concello coa Pokémon… pero non. O caso é favorecer ao PP ou criticar á oposición.