Unha realidade sen filtros, pola sección sindical da UXT na CRTVG

 

Seguindo coa publicación dos artigos especiais polas 100.000 visitas ao noso blog, continuamos hoxe cos textos enviados polas distintas seccións sindicais que forman parte dos comités de empresa da TVG e da Radio Galega. Hoxe corréspondelle a quenda á UXT. A orde de publicación, de maior a menor representatividade, é CUT (publicado o venres, 24), CIG (publicado o sábado), UXT (hoxe), USO (luns, 27), CC.OO. (martes, 28), Sindicato de Xornalistas (mércores, 29) e Alternativa Radio Galega (xoves, 30).

 

Unha realidade sen filtros

 

Sección sindical da UXT na CRTVG

A CRTVG, a TVG e a Radio Galega, que conformarán a futura corporación de medios públicos de Galicia, teñen na súa acta fundacional dous obxectivos irrenunciables, o apoio ao idioma propio de Galicia, con todo o que significa para a normalización social da lingua que conforma a nosa identidade como país, e o servizo público, nas súas vertentes informativas, divulgativas, de documentación e de tempo de lecer de calidade, que deberían contribuír decisivamente ao fornecemento da identidade cultural de Galicia.

O ano vindeiro cumpriranse 30 anos da posta en marcha da primeira emisión da TVG sen que –salvo algún que outro paréntese- ningún dos obxectivos citados se cumpriran, nin por aproximación, ao longo de case que toda a súa existencia.

Agora, cando as cotas de iniquidade informativa se superan día a día, e desde tantas instancias interesadas se está a tirar con bala contra os medios públicos de comunicación, é cando os profesionais da TVG temos que seguir denunciando a manipulación, cada vez máis basta e torpe, á que se somete a cotío a información por parte dos actuais responsables dos medios públicos de comunicación de Galicia.

Só así, desde dentro, coa denuncia constante, seremos capaces de lle transmitir á sociedade galega que nada está perdido, que hai esperanza porque a TVG conta con profesionais dispostos a cumprir e facer cumprir as regras do xogo, que non son outras que as do traballo constante na procura de achegar aos galegos e galegas unha realidade sen filtros que a oculten ou a deformen segundo os intereses do goberno correspondente.

A outra parte da nosa reivindicación terá por forza que ser a de instar a tódalas forzas políticas a promover e aprobar unha nova lei de medios públicos de Galicia que independice de verdade e dunha vez por todas a futura corporación do poder político de cada momento.