Arquivo por días: Abril 11, 2013
Os “tratos” do Bloque con Herri Batasuna
No Telexornal Serán do mércores 10 de abril pódese escoitar que ” o Presidente Feijóo replicou que non acepta leccións morais do Bloque porque anda en tratos con Herri Batasuna” (sic).
Como se pode escoitar no enlace Feijóo realmente pregúntalle ó nacionalismo “se cando invitaba a Herri Batasuna ó Día da Patria coñecía a súa relación co terrorismo”.
Herri Batasuna desapareceu despois da súa refundación no ano 2001 convertido en Batasuna, que á súa vez se autodisolveu en xaneiro deste ano.
Manipulación dende o titular
Así titulou a CRTVG o debate parlamentario do mércores 10 de abril no que o Presidente da Xunta compareceu para explicar a súa relación con Marcial Dorado.
Como podedes escoitar no seguinte enlace Feijóo dixo que “o bipartito concedeulles ás empresas de Dorado máis axudas que calquera das lexislaturas do Presidente Fraga”. O titular da web da CRTVG en cambio omite a alusión ás lexislaturas do Partido Popular.
Así trataron os xornais con máis lectores de Galicia a información.
Dúas horas en 25 segundos
En 25 segundos se despachaba no Telexornal Serán a comparecencia de dúas horas de Ángel Sanchís, ex tesoureiro popular ente 1982 e 1987, diante do xuíz Ruz para explicar a súa relación con Luís Bárcenas. Foi o 10 de abril de 2013.
http://www.crtvg.es/informativos/sanchis-declara-na-audiencia-por-presunto-branqueo-de-cartos-564850
O tratamento está na liña “doutros medios”, aquí deixamos unha pequena escolma para que comparedes.
http://politica.elpais.com/politica/2013/04/10/actualidad/1365625626_431449.html
http://www.abc.es/espana/20130410/abci-sanchis-declaracion-barcenas-201304101916.html
http://www.telecinco.es/informativos/nacional/Ruz-Angel-Sanchis-Barcenas-Suiza_0_1586025025.html
Tratamento da Comparecencia de Feijoo no Parlamento sobre Marcial Dorado
O tratamento informativo no TX mediodía deste 10 de abril, sobre a comparecencia de Feijoo no Parlamento para dar detalles da súa relación con Marcial Dorado, foi completamente tendencioso e cunha desproporción absoluta no tempo adicado ao goberno e ao PP, e aos partidos da oposición.
Neste primeiro video só se ofrece a intervención de Feijoo (1 minuto e 8 segundos), destacando que a meirande parte de contratos coa empresa de Dorado fixoa o bipartito (por certo, recoñecendo que tamén houbo contratos nos gobernos de Fraga…).
No segundo video, dase a intervención do BNG (só 19 segundos de Jorquera falando de mortos pola droga) e logo a contestación de Feijoo (27 segundos) relacionando ao BNG co terrorismo.
A continuación emítese un video de case 50 segundos, adicado soamente ao que chaman “interrupcións” de Beiras e Jorquera na sesión, cun rótulo sobre as imaxes que di textualmente: “Beiras e Jorquera interrompen a comparecencia”, e escoitándose claramente as chamadas de atención da presidenta da Cámara a ámbolos. É unha clara intención de descalificar a eses deputados de AGE e BNG, dándolle especial relevancia á información, que se emite antes das intervencións de AGE, PS de G-PSOE e PP.
E de seguido, dase o video da intervención de Beiras por AGE… cando se derruba emocionalmente e mesmo chora polo “noxo” que lle da esta Xunta… Só se dan 20 segundos de Beiras. Logo ofrécese a contestación de Feijoo (35 segundos) que … presume de ser de aldea e ironiza con que nunca tivo piano nin estudou na Sorbona (en alusión ao propio Beiras).
Despois chega o tempo para o PS de G-PSOE, no que se ofrece brevemente a intervención de Pachi Vázquez, e logo a contestación de Feijoo (31 segundos) na que insinúa que Vázquez o visitou para pactar silencios sobre a operación Campeón, onde hai imputados de ámbolos partidos. Esta xuntanza desmentiuna o secretario xeral dos socialistas que afirmou que a Xunta non quixo achegar datos sobre as subvencións ás empresas de Dorado.
E finalmente, dase a intervención de Puy (PP), que en 49 segundos eloxia e bota frores a Feijoo persoal e politicamente, dicindo que o Partido e a xente galega “de ben” está con é. Omitiuse a frase do voceiro do PP na que dixo textualmente que “Feijóo foi utilizado por narcotraficantes para lexitimarse”.
Resumindo: fíxose unha información totalmente favorable ao PP e a Feijoo, onde o de menos foi a relación que mantivo con Marcial Dorado. A TVG descalificou totalmente aos membros de BNG e AGE, e tentou (unha vez máis) relacionar ao PS de G-PSOE con casos de corrupción. E sumando os tempos que lle adicaron ás intervencións… é escandalosa a diferenza a prol do PP.
Denuncia da manipulación informativa na TVG 
Debe estar conectado para enviar un comentario.